Ўзбекистон ҳудудида тадбиркорлик фаолиятини амалга оширувчи, товар ёки хизматлар реализация қилувчи қуйидаги субъектлар кўшилган қиймат солиғи (ҚҚС) тўловчилари саналади:
товар ёки хизматларни реализация қилишдан олинган даромади йил давомида 1 миллиард сўмдан ошган ёхуд ихтиёрий равишда ҚҚС тўлашга ўтган тадбиркорлик субъектлари, шу жумладан якка тартибдаги тадбиркорлар
Ўзбекистон ҳудудида товар ёки хизматларни реализация қилувчи чет эл компаниялари
Реализация қилиш жойи Ўзбекистон бўлган аҳолига электрон шаклдаги хизматларни кўрсатувчи чет эл комапниялари
Ўзбекистон божхона чегараси орқали товарларни олиб кирувчи тадбиркорлик субъектлари
Айланмадан олинадиган солиқни тўловчи тадбиркорлик субъектлари ҚҚС тўловчиси ҳисобланмайди. Якка тартибдаги тадбиркор томонидан шахсий ёки оилавий мол-мулкни тадбиркорлик билан боғлиқ бўлмаган мақсадда реализация қилиш ҚҚСга тортилмайди.
Қоида тариқасида, маҳсулот етказиб берувчи томонидан ҳисобварақ-фактура тақдим этилган сана ёки товарлар жўнатилган сана (агар товарлар ҳисобварақ-фактура тақдим этилишидан олдин жўнатилган бўлса) товарларни реализацияси амалга оширилган санадир.
ҚҚС ставкаси 12% миқдорида белгиланган.
Солиқ тўловчилар ҚҚС бўйича солиқ ҳисоботини ҳар ойда, кейинги ойнинг 20-чи кунидан кечиктирмаган муддатда тақдим этишлари шарт. ҚҚС суммасини тўлаш ушбу муддатдан кечиктирмай амалга оширилади.
Ўзбекистон ҳудудига товарларни олиб кириш чоғида ҚҚСни тўлаш божхона қоидаларига мувофиқ амалга оширилади.
Қўшилган қиймат солиғи бўйича имтиёзлар
Ўзбекистон ҳудудидан божхона орқали экспорт қилинган товарлар ноль даражали ставка билан ҚҚСга тортилади (яъни, ҚҚС тўланмайди).
Шунингдек, қуйидагилар ҚҚСдан озод этилади:
мактабгача таълим ташкилотларида болаларга қараш бўйича хизматлар
беморлар ва кексаларни парвариш қилиш бўйича хизматлар
протез-ортопедия буюмларини, ногиронлиги бўлган шахслар учун инвентарни реализация қилиш, шунингдек ногиронлиги бўлган шахсларга ортопедик протезлаш бўйича кўрсатиладиган хизматлар
ўқитиш (таълим) соҳасидаги хизматлар, шу жумладан тест синовлари ва имтиҳонлар ўтказишни ташкил этиш хизматлари
тиббий ёрдамга ва санитария хизмати кўрсатишга доир хизматлар (бундан косметологик хизматлар мустасно), ташхис қўйиш, профилактика ва даволаш бўйича хизматлар ҳамда стоматологик хизматлар
ветеринария хизматлари
дори воситаларини, тиббиёт ва ветеринария учун мўлжалланган буюмларни реализация қилиш
санаторий-курорт, соғломлаштириш хизматлари
уй-жой фондини сақлаш ва таъмирлаш юзасидан аҳолига кўрсатилаётган хизматлар
кўп квартирали уйларни бошқарувчилар томонидан умумий мол-мулкни бошқариш, унга техник хизмат кўрсатиш ва уни таъмирлаш